Австралија да ја остави на сила забраната за патување во странство и да не ги отвора своите граници барем уште четири месеци, се наведува во пораката на главниот санитарен лекар во државата, Брендан Марфи до Парламентарна комисија за борба против ковид-19.
„Коронавирусот се шири низ целиот свет и актуелната меѓународна ситуација е таква што секое намалување на граничните мерки би претставувало исклучително ризичен чекор“, нагласи Марфи.
Тој најави дека властите ќе разгледаат олеснување на ограничувањата на масовните собири во блиска иднина, но „големите настани ќе останат забранети“.
„Ќе бидат разгледани ограничувањата кои влијаат на малите продавници и игралишта, но ние прво мора да го процениме ризикот по здравјето на луѓето“, истакна Марфи.
До денеска во Австралија се пријавени 6.659 заразени од ковид-19, излекувани се 4.671 лице и регистрирани се 75 смртни случаи. Во изминатите 24 часа се откриени 12 нови случаи, што е најмала бројка од 9 март.