Министерот за правда Бојан Маричиќ во интервју за словенечкиот весник „Дело“ ја истакнува важноста на проширувањето на Европската Унија да се одвива по претходно утврдени принципи, реални заслуги и испорачани резултати, но ја нагласува и потребата Унијата да даде временска рамка и план за проширувањето на земјите од Западен Балкан.
Ние навистина направивме сѐ и покажавме искрена желба за решавање на отворените прашања, водејќи се од европските вредности. Затоа верувам дека проблемот со Бугарија може да се реши низ директен дијалог. Но, она што за нас е важно е тој дијалог да се темели на европски вредности и принципи, а не на основа „кој е посилен” или, пак, кој е член на Унијата, а кој не е”, истакна Маричиќ во интервјуто за словенечко „Дело“.
Маричиќ додаде дека прашањето со Бугарија за него не е само билатерален спор, туку и ситуација за која Европската Унија во иднина треба да дефинира што може држава членка на Унијата да бара од држава кандидат.Ние сме подготвени за дијалог и веќе разговараме за отворените прашања, но, исто така сме подготвени тие отворени прашања да ги третираме и во текот на преговорите со ЕУ. Но, во никој случај не сме спремни да се откажеме од македонскиот јазик и од нашиот идентитет, вели Маричиќ за „Дело“.
Македонскиот министер за правда додава дека Владата на Република Северна Македонија покажала дека е составена од прогресивни сили кои навистина веруваат во политиките на ЕУ и нејзините вредности и очекувааат од Унијата, од нејзините институции и од земјите членки да дадат свој придонес и заложба за нашата евроинтеграција.