Со персоналот во градинките, како и на одредени ризични категории, од денеска почнува масовниот скрининг на населението на ковид-19. Министерот за здравство Венко Филипче вчера најави дека процесот ќе стартува со вработените од градинките кои се близу 2.000 во функција на изготвување на протокол за работа пред нивно повторно ставање во функција.
„Во следниот период очекуваме стабилна и мирна состојба во однос на епидемијата. Бидејќи капацитетите за тестирање се растоварени, од среда почнуваме со масовен скриниг, најпрвин со вработените во детските градинки, истакна Филипче.
Скринингот ќе се прави со истите ПСР тестови како и досега, а целта е со ПСР техниката да се идентификуваат асимптоматските носители. Со ова, според планот, треба да бидат опфатени вработени во градинките, во болниците, во домовите за стари лица, пациентите со хронични болести, пациентите на биолошка терапија, вработените во ЈСП и други од десетината ризични групи.