Килијан Мбапе ќе има главна улога на фудбалскиот пазар во летниот преоден рок. Тоа станува јасно уште од сега судејќи по пишувањата на медиумите, особено шпанските, според кои големите европски клубови почнаа со наддавање за 18 годишниот тинејџер на Монако.
Ако е за верување на шпанската радио станица „Кадена Копе“, тимот од Кнежевството го одбил вториот финансиски напад од „Олд Трафорд“. Станува збор за наводна понуда од 110 милиони евра што, во случај на реализација, би претставувала нов рекорден трансфер во светот на фудбалот.
Но, Жозе Мурињо не е единствениот кој е заинтересиран за услугите на младиот напаѓач. Шпанските „Марка“ и „Ас“ излегоа со, речиси, идентични насловни страници на кои се насмевнува новата фудбалска суперѕвезда. Според двата весника, Мбапе наскоро ќе биде промовиран во нов член на Реал Мадрид. Управата на „кралскиот“ клуб е наводно подготвена да издвои 120 милиони евра за отштета на Монако.
Во трка по Мбапе, кого го споредуваат со Тиери Анри, се и Барселона, ПСЖ, Јувентус, и останатите гиганти во Премиерлигата покрај Јунајтед.
Младиот фудбалер потекнува од школата на Монако. Со екипата од „Луј Втори“ го врзува договор до летото во 2019 година според кој има месечна плата од 85.000 евра. Вниманието на европскиот фудбал оваа сезона го привлече со брилијантните партии и ефикасни настапи за лидерот во француската Лига 1. Во 32 натпревара постигна 19 гола, подели 11 асистенции, а посебно е инспириран во последните шест недели што ги зачини со 11 гола и пет додавања во само девет настапи.