Мерките кои францускиот претседател Емануел Макрон синоќа ги најави со цел смирување на бранот протести ширум земјата, ќе чинат меѓу осум и 10 милијарди евра, изјави државниот секретар во француското Министерство за јавни сметки Оливие Дисопт.
– Моментално сме во процес на прецизирање (на расходите) и ќе видиме како ќе го финансираме тоа, рече Дисопт за француската телевизија БФМ.
Макрон синоќа во телевизиско обраќање, меѓу другото, изјави дека ќе ги намали даноците за пензионерите и ќе ја зголеми минималната плата за 100 евра месечно, од јануари 2019, но дека нема повторно да воведе данок за богатите.
Кусо време потоа, генералниот секретар на францускиот синдикат Генерална конфедерација на труд (ЦГТ), Филип Мартинес оцени дека мерките што ги најави Макрон не се доволни и повика на „мобилизација заедно со жолтите елеци“ во петок на 14 декември.
Европската комисија ќе ги разгледа внимателно буџетските последици од мерките објавени синоќа од страна на францускиот претседател, изјави заменик-претседателот на ЕК, Валдис Домбровскис.
–Ги следиме одблизу новите најавени мерки, но не можеме да ги коментираме пред да бидат претставени во детали, додаде комесарот задолжен за еврото и социјалниот дијалог. Тој тоа го изјави во Стразбур, каде што се одржува пленарна седница на Европскиот парламент.