Синиша Михајловиќ со шокактни вести по неговото здравје, но најави дека останува на кормилото на Биолоња. Легендарниот српски фудбалер и член на шампионската генерација на Црвена звезда од 1991 година на прес-конференција во Италија објави дека боледува од агресивна форма на леукемија, но најави борба до конечна победа. Веднаш по него се јави и директорот на калчолигашот, Валтер Сабатини и порача дека Михајловиќ ќе остане тренер на екипата.

„Направив тестови кои покажаа дека имам леукемија. Бев во шок кога ги слушнав резултатите. Два дена плачев, а животот ми минуваше пред очи. Но, тоа не беа солзи од страв. Ја почитувам болеста, ќе се соочам со неа со крената глава. Со нетрпение чекам да почнам да се борам да оздравам. Агресивна е, но не е непобедлива. Им реков на фудбалерите дека ќе се борам да победам како што го учев и нив на терен. Нема седење и чекање. Им објаснив дека ако седиме и чекаме да се одбраниме, ќе бидеме нокаутирани. Затоа мора да нападнеме“, рече Михахјловиќ.

Михајловиќ во јануари по вторпат седна на клупата на Болоња како замена за Филип Инзаги. Ја презеде екипата во незавиден момент, но успеа да го обезбеди опстанокот во Серија А. Пои завршување на сезоната доби договор со 2022 година со гаранции од клубот дека ќе има вложувања во тимот.

Покрај Болоња, Михајловиќ работеше како тренер и во Катанија, во Фиорентина, во Сампдорија, во Милан и во Торино. Како фудбалер, освен во дресот на Црвена звезда, играше и за Борово, за Војводина, за Рома, за Сампдорија, за Лацио и за Интер.