Заврши постапката за формирање на партиципативно тело што ќе учествува во процесот на урбанистичко планирање на подрачјето на општината, информираат од Општина Центар.
– Со ова тело, составено од претставници на невладиниот сектор и на граѓаните, кои се жители на Центар, ќе се овозможи зголемен увид на јавноста во процесот на урбанистичкото планирање. Истовремено, ќе им се даде шанса на граѓаните и граѓанските организации, директно, преку свои претставници во партиципативното тело, да даваат совети, идеи и предлози во врска со подобрувањето на условите за живот, престој и транзит во општината, се вели во соопштението на Општина Центар.
Партиципативното тело за урбанистичкото планирање во Општина Центар, како што стои во дописот, брои пет членови кои се истакнати експерти во своите области и граѓански активисти. Во него ќе членуваат: Ана Чоловиќ Лешоска (извршна директорка на Еко-свест), Даница Павловска (архитектка, просторна планерка), Кристина Хаџи-Василева (магистерка по родови студии), Милчо Манчевски (режисер) и Жанета Трајкоска (новинарка и директорка на Институт за комуникациски студии).
– Целта на партиципативното тело е преку учество на јавноста, во соработка со општинскиот Сектор за урбанизам и урбанистичко планирање, да се даде поголем простор за предлози на граѓаните при идното планирање и развитокот на Општина Центар. Со помош на членовите на телото дополнително ќе се зголемат предусловите за создавање на една современа, граѓанска, еколошки свесна општина, која како централна општина во градот Скопје, ќе биде пример и за останатите општини во земјата, нагласуваат од Центар.