Благоја Милевски имаше причини за задоволство по денешното издание на новата генерација фудбалери во младата репрезентација. Расположението на селекторот е логично по триумфот на Македонија против Црна Гора со 2:0 во пријателскиот натпревар што се одигра во тренинг комплексот „Петар Милошевски“ крај ФФМ. Стрелци беа Елмаз во 31 минута и Чешмеџиев од белата точка во 75 минута.
„Ја имавме потребната концентрација во текот на сите 90 минути. Како што се договоривме, така и одигравме. Покрај играта, задоволен сум и од резултатот. Важна победа иако натпреварот беше пријателски, но низ таквите се создава и негува однос кон репрезентативниот дрес и победнички менталитет“, истакна предводникот на младата селекција.
Домашната репрезентација ја имаше контролата, беше подобар ривал, и заслужено се радуваше на крај. Покрај двата гола можеше барем уште толку преку Петковски, Костадинов, Кулески, Абаз и Доријан Бабунски, но само неприсебноста ги спречи да слават и со поубедлива разлика.
Младата репрезентација на Македонија, но сега генерацијата што ќе игра на Европското првенство во Полска од 16 до 30 јуни, во вторник ќе одигра контролен меч со Бугарија.