Баерн Минхен во стилот „да се знае кој е кој во Германија“. Баварците немаа милост кон Борусија и им посакаа „среќен пат“ на „милионерите“ со полна мрежа голови. Лидерот на бундеслигашката табела ги понижи „жолто-црните“ од Дортмунд со 6:0 во дербито на 28 рунда како одлична наваја за претстојниот судир со Севилја во четврт-финалето во Лигата на шампиони.

А, какво попладне го очекува гледачите на „Алијанц арена“ навести Роберт Левандовски во раната фаза на мечот. Полскиот репрезентативец уште во петтата минута го постигна првиот од своите три гола на натпреварот. Погоди по асистенција на Томас Милер, а до паузата реализира и во 44 минута. Во меѓувреме, во листата на стрелци се запишаа и Родригез во 14., Милер во 23, во судиското надополнување и Рибери за комплетирање на „петардата“ на Баерн пред продолжение на средбата.

Борусија делуваше тотално отсутно на теренот, безидејно, неповрзано, порозно. Се обиде да постигне барем почесен погодок во вториот дел на горчливото гостување во Минхен што не им појде од нога на нејзините напаѓачи. Но, затоа му појде на Левандовски кој во 87 минута го заокружи хет-трикот и голеадата на „Алијанц арена“.

Баерн Минхен е убедлив лидер во Бундеслигата со 69 бода, дури 17 повеќе од Шалке на втората позиција и 21 од Борусија Дортмунд на третата.

Бундеслига

Резултати, 28 коло

Баерн Минхен – Борусија Дортмунд 6:0

Штутгарт – Хамбургер 1:1

Шалке – Фрајбург 2:0

Хофенхајм – Келн 6:0

Хановер – Лајпциг 2:3

Баер Леверкузен – Аугсбург 0:0

Херта – Волфсбург (играат во моментот)

Недела

Вердер – Ајнтрахт Франкфурт (15,30 ч.)

Мајнц – Борусија Менхенгладбах (18 ч.)

Табела: Баерн Минхен 69, Шалке 52,  Борусија Дортмунд 48, Лајпциг 46, Баер Леверкузен 45, Ајнтрахт Франкфурт 45 (-1), Хофенхајм 42, Штутгарт 38, Аугсбург 36, Борусија Менхенгладбах 36 (-1), Херта 35 (-1), Вердер 33 (-1), Хановер 32, Фрајбург 30, Волфсбург 25 (-1), Мајнц 25 (-1), Келн 20, Хамбургер 19.