Пјер Емерик Обамејанг е под суспензија во Борусија Дортмунд што беше доволна причина за германските медиуми да прогласат криза во клубот од „Вестфален“. Во отсуство на конкретни причини се шпекулира дека изречената мерка за првиот стрелец и ѕвезда на „милионерите“ е од дисциплинска природа и дека ќе биде надвор од комбинација за утрешниот дуел (петок) против Штутгарт во Бундеслигата.
Габонецот по вторпат е ставен „под мраз“ во Борусија по идентичната казна во минатиот ноември. Обамејанг тогаш го пропушти гостувањето кај Спортинг Лисабон поради приватно патување во Милано.
Оваа сезона има 10 погодоци на 11 меча, но „пости“ веќе пет настапи во низа на сите фронтови во изминатиот месец. Последниот гол го прослави против Лајпциг во октомври. Истото важи и за репрезентативните средби. Не успеа да се впише меѓу стрелците за Габон во двата завршни меча од квалификациите за СП 2018.
На Борусија не ѝ цветаат рози во Бундеслигата, натпреварување во кое нема победа од крајот на септември. Во меѓувреме испадна од игра и за првите две позиции во групата Х во Лигата на шампиони меѓутоа надежта за враќање на посакуваното ниво не ги напушта, па веруваат оти репрезентативната пауза ќе се одрази позитивно врз играта и резултатите на екипата во наредниот период.