Пациентите од целата држава непречено ќе добијат секаква здравствена интервенција за време на посетата на папата Франциск и соодветно ќе биде одговорено на сите итни медицински потреби на граѓаните. Ова е порака од Министерството за здравство врз основа на посебно изготвен план по повод посетата на високиот гостин во вторник на Скопје.
„Клиничкиот центар во Скопје ќе биде прилагоден на посебните меѓународни стандарди што се применуваат во сите земји кои ги посетува Папата, со цел најпрофесионално и најбрзо да се одговори на евентуални медицински потреби на високата делегација предводена од Папата. Паралелно, Министерството за здравство изработи посебен план со кој ќе овозможи непречена здравствена заштита на сите граѓани кои ќе имаат потреба“, се наведува со соопштението на Министерството за здравство.
Од таму апелираат до сите граѓани да се упатуваат во Градската општа болница „8 Септември“ (поранешна Воена болница) за сите здравствени потреби, како и во Клиниката за хируршки болести „Св. Наум Охридски“ (поранешна Градска болница) за сите потреби поврзани со дигестивна хирургија, трауматологија, ортопедски болести, реанимација и интензивно лекување, урологија и неврохирургија.
„Овие здравствени установи ќе бидат со полн капацитет и полна мобилност тој ден, со цел да одговорат на потребите на граѓаните. Клиничкиот центар останува отворен што значи дека сите граѓани со итни потреби до кои нема да стигне апелот за користење на болниците „8 Септември“ и „Св. Наум Охридски“, а кои, сепак, ќе се упатат кон Клинички, ќе бидат прифатени и ќе добијат интервенција. Исто така, граѓаните можат да се упатат кон Клиничкиот центар и за сите услуги на Клиниката за детски болести и на Клиниката за гинекологија и акушерствo“, е нагласено во дописот до медиумите.
Поради посебниот сообраќаен режим, приватни возила нема да се пропуштаат до паркиралиштата на Клинички центар до кои пристап ќе имаат само возилата на Итната медицинска помош. Забраната за приватни возила во кругот на Државна ќе почне во понеделник во 18 часот и ќе трае 24 часа.
Од здравство информираат дека поради посебните протоколи поврзани со посетата на Папата, сите редовни прегледи на клиниките во Клиничкиот центар што граѓаните ги имаат закажано за 7 мај во рамките на „Мој Термин“ ќе бидат презакажани во најбрз можен рок по седми мај.