Од минатиот 2 август до овој, мина само една година, меѓутоа, верувам дека го делите моето мислење дека тоа е година што ќе ја запомниме по еден од најзначајните датуми за нашата земја. На 11 февруари оваа година, Собранието го ратификува Протоколот за членство на Северна Македонија во воено-политичкиот сојуз на НАТО, една од стратешките цели што беа поставени уште во 1993 година, рече потпретседателот на Собранието, Горан Мисовски во обраќањето од Мечкин Камен во Крушево каде ја предводеше собраниската делегација, во отсуство на спикерот Талат Џафери, по повод одбележувањето на Денот на Републиката – 2 август.
Обезбедивме, нагласи тој, сигурност на територијалниот интегритет и безбедност на нашата граница и сега, конечно, може да се каже дека е поставен уште еден камен на зацврстување на темелите на нашата држава.
„Вие почитувани граѓани, без оглед на премрежјата и кризите, без оглед на различностите, не дозволивте да се наруши духот на заедништво, соживот и толеранција и вие, токму вие имате огромен удел во одржувањето на овој ритам и оваа напредна ориентација. И затоа, денес, кога ги одбележуваме двата Илиндена и кога изразуваме неизмерна почит и благодарност до сите илинденци, изразувам восхит за нивната храброст, мудрост, визија и пожртвуваност“, истакна потпретседателот на Собранието.
Сите ние, нагласи, сме наследници на Илинден, затоа што веруваме дека тоа и во иднина ќе биде најдобриот и вистински концепт што ги опфаќа заедничките вредности кои сите ги славиме, ги празнуваме, вредностите кои нè обединуваат и нè поврзуваат, нè прават горди и сплотени граѓани на нашата заедничка држава.
„Имаме одговорност тој концепт да го чуваме и развиваме за нас и за идните поколенија. Имаме обврска да изградиме таква граѓанска држава во која нашите деца, внуци и сите идни генерации ќе се чувствуваат европски, светски, а сепак дома, свои на своето, во современа и просперитетна Република Северна Македонија. Нека е среќен и вечен 2 август, Денот на Републиката“, заклучи Мисовски.