Петроввец, Илинден, Зелениково и Ѓорче Петров беа местата што денеска ги посети ВМРО-ДПМНЕ во рамки на активностите во пресрет на локалните избори на 17 октомври. Централниот митинг се одржа во паркот во Ѓорче Петров каде, меѓу другите, се обрати лидерот на партијата, Христијан Мицкоски.
Дури ни 2030-та година не е годината кога Македонија и Западен Балкан ќе бидат дел од Европската Унија (ЕУ), нагласи вечерва претседателот на ВМРО-ДПМНЕ Христијан Мицкоски од Општина Ѓорче Петров.

Мицкоски рече дека со СДСМ нема Европска Унија, бидејќи, како што кажа, тие се длабоко навлезени во криминал и корупција.

Не само што со СДСМ нема датум, туку и Македонија ја втурнаа во нова криза во европските интеграции што поради нивниот криминал и заразната корупција, ЕУ стана далечна цел. А се сеќавате, ни викаше излезете за Европска Македонија – и ќе имаме бесплатно здравство. Имаше билборди на кои ни порачуваше дека ќе обезбедил бесплатни студии во Европа, 250.00 евра помош секој ден, 18 милиони евра за реформи во судството и што уште не. А каква е реалноста?, рече Мицкоски.

Во својот говор Мицкоски се осврна и на Извештајот за пожарот во модуларната болница во Тетово и обвини дека е лага оти кабелот и струјата се виновни за изгорените 14 луѓе и нагласи дека ќе одговараат за трагедијата.

Носителот на советничката листа за Град Скопје, Трајко Славески, пред граѓаните на Општина Ѓорче Петров порача дека е доста од загадено и уништено Скопје. Тој вети дека Скопје ќе биде град со нова Универзална сала, нов забавен парк, ред во сообраќајот, како и град со безбеден и ефикасен еколошки јавен превоз.

„Со целосна поддршка на Програмата за модерно Скопје на независниот кандидат за градоначалник Данела Арсовска, ние се обврзуваме и гарантираме исполнување на клучните приоритети за градот Скопје. Размислуваме и планираме стратешки, темелно и долгорочно, а делуваме практично, брзо и сигурно. Град со ред во сообраќајот. Град со безбеден и ефикасен еколошки јавен превоз. Гасифициран град со можност за приклучок во секое домаќинство. Град со десетици илјади метри квадратни нови паркови. Град со нова Универзална сала, нов забавен парк. Град со нови можности за младите да останат да живеат и творат во Скопје. Тоа е Скопје што го сакаме, тоа е Скопје што го заслужуваме. Тоа е Скопје за кое вреди да се бориме“, посочи Славески.