Лидерот на опозициската партија ВМРО-ДПМНЕ, Христијан Мицкоски, го прифаќа предлогот од премиерот Зоран Заев, укинување или намалување на прагот на 1% за независните кандидатски листи за советници во општините на локалните избори кои ќе се одржат на 17 октомври.
– Во текот на вчерашниот ден имав можност да ја слушнам изјавата на Зоран Заев дека тие ретерираат од тие 2%, колку што разбрав се враќаат на 1%, еве и тоа го прифаќаме. Еве прифаќаме и да нема проценти. Само нека има фер и демократски избори, да нема злоупотреба, притисоци, закани, уцени, изјави лидерот на ВМРО-ДПМНЕ, Христијан Мицкоски.
Тој вели дека во преговорите за измените на Изборниот законик уште во март, предлогот за зголемување на прагот за независните кандидати дошол од власта, на што тие како опозиција се согласиле во име на фер и демократски избори.
– Помалите партии бараа отворени листи, ВМРО ДПМНЕ се сложи на тоа. Потоа се предомислија и рекоа ‘не сакаме отворени листи’. Повторно ВМРО-ДПМНЕ се сложи. Од страна на власта исто така се побара да се зголеми прагот на оние листи коишто им се потребни потписи за да ја истакнат својата кандидатура. ВМРО-ДПМНЕ, бидејќи тоа беше барање на власта, само за да има фер и демократски избори рече и на тие преговори, ‘како вие мислите, само изборите да бидат фер и демократски, така ќе прифатиме’. Потоа гледаме дека помалите коалициони партнери ретерираа од тој став, ВМРО-ДПМНЕ изрази разбирање за ставот на помалите политички партии, го поддржа тоа и ставот на ВМРО-ДПМНЕ беше да се договорат во владината коалиција, сè што тие ќе се договорат тие ние ќе прифатиме, изјави Мицкоски.
Вчера премиерот Зоран Заев најави намалување на прагот од два на еден процент или негово укинување.
И претседателот на државата, Стево Пендаровски, смета дека треба да биде помал прагот за независните кандидати.
Граѓанската иницијатива „Зелен хуман град“ нема да биде задоволна ниту со намален праг од 1%, бидејќи за кандидати за советници во Град Скопје ќе им бидат потребни 5.000 гласови, а за пратеник потребни се пет пати помалку. Тие бараат јавна дебата, а кога се во прашање изборните правила да не решаваат само поголемите политички партии, кои, според „Зелен хуман град“, носат одлуки во нивни интерес.
„Зелен хуман град“: За пратеник се потребни помалку потписи отколку за независни советници во Скопје