Овој состав на Парламентот е поранешен и мандатот на претниците со неговото распуштање е завршен. Тие го вратија легитимитетот назад кај граѓаните. Единствен што може да ја наполни салата во Собранието е народот. Не може ниту Зоран Заев, ниту група на пратеници да се обидуваат да го кршат Уставот, рече денеска лидерот на ВМРО-ДПМНЕ, Христијан Мицкоски.
Мицкоски на прес-конференција уште еднаш повтори дека приоритет на ВМРО-ДПМНЕ сега не се предвремени избори, туку надминување на состојбата со коронавирусот.
„Одржување на предвремените парламентрани избори во услови на пандемија на ковид-19 и секојдневна борба со инфицирани луѓе и жртви, кога се соочуваме со економска, санитарна и образовна криза, па и воопшто кога имаме кризна состојба, не еден од приоритетите. Најпрво да се избориме за здравјето на граѓаните, да ја вратиме економијата на победничките патеки, а потоа можеме да размислуваме за избори“, истакна Мицковски, одговорајќи на прашање „дали ВМРО-ДПМНЕ ќе учествува на избори ако тие се одржат на крајот на јуни или во почетокот на јули“.
Лидерот на ВМРО-ДПМНЕ на прес-конференцијата ја обвини Владата дека во првите три месеци од годинава потрошила нешто под 43 отсто од вкупно планираниот буџетски дефицит за 2020 година или 120 милиони евра повеќе од тоа што е собрано во државната каса. Со тоа, нагласи Мицковски, власта го задолжила секое македонско семејство по 15.000 денари во просек.
„Анализите покажуваат дека врз Буџетот е направен смислен и добро организиран грабеж на народните пари. Трошено е безмилосно, расипнички и недомаќински, а за тоа постојат и конкретни бројки. Само во март се потрошени 50 милиони евра повеќе од она што е собрано во Буџетот, а лани истиот месец биле потрошени само седум милиони евра“, обвини Мицковски. Тој додаде дека во првите три месеци од 2017 година биле потрошени 19 отсто од планираниот буџетски дефицит, во 2108 година околу 17 отсто, а лани нешто над 18 проценти од планираниот буџетски дефицит.