Претседателот на ВМРО-ДПМНЕ, Христијан Мицкоски денеска ја посети Македонска Каменица и посочи дека ова се прилично предизвикувачки избори затоа што на нив практично се определува иднината на нашите граѓани и потомци, но истовремено и кога треба да ги направиме горди нашите предци.
Според Мицкоски, ова не се какви било избори и се поразлични од сите други во минатото. На овие избори, како што кажа, изборот е меѓу СДСМ и нивните истрошени транзициски политичари без никаква креативна идеја и луѓе кои со својата биографија и животен век не може да гарантираат решение за напластените проблеми што се повеќе се зголемија по овие три години.
„Јас сум убеден дека овие избори ќе завршат со една голема победа на ВМРО-ДПМНЕ и коалицијата „За обнова на Македонија“, потенцира Мицкоски.
Лидерот на ВМРО-ДПМНЕ рече дека доаѓа време на политичари кои заедно со народот ќе разговараат што му треба и кои чесно ќе работат за сопствениот народ и држава.
„Ние напишавме програма што ја нарековме „Обнова“ од 360 страни во која ќе најдете како до повисока просечна плата во еден мандат од најмалку 25 отсто, како до 20 отсто повисока пензија и враќање на старото законско решение, како до стапка на невработеност пониска од 10 отсто, четири милијарди евра странски и домашни инвестиции, ослободување на студентите од партиципација во учебната 2020/2021 година, намалување на данокот на додадена вредност за угостителите, историски најнизок рамен данок од 8 отсто, 640 милиони евра субвенции за земјоделците“, додаде Мицкоски во Македонска Каменица.