Претстојните избори се историски, бидејќи треба да се трасира иднината на македонското поколение, но и да се обели образот на нашите претци кои со живот го платиле она што ние денеска го живееме, рече лидерот на ВМРО-ДПМНЕ, Христијан Мицкоски на вечерашната трибина во Крушево. Тој, како што нагласи, е убеден во победа на неговата партија, а на Зоран Заев му порача дека по 15 јули ќе заврши со политичката кариера.
„Еве од овде, од Крушево кажувам, јас сум Христијан Мицкоски кој ќе те победи Зоране Заев и тука ќе заврши твојата политичка кариера. И еве ти кажувам дека се обврзувам на почитување на твоето право на презумпција на невиност и ќе имаш можност да ја докажуваш невиноста пред судовите. Но, не знам дали ќе успееш во тоа, нагласи Мицкоски.
Според него, земјава на 15 јули ќе биде на историска раскрсница.
„На 15 јули ќе се најдеме на историска раскрсница, дали да прифатиме истрошени и потрошени политичари или ќе одбереме маестро, патриот, човек кој реди успеси и надвор од Македонија и со аплаузи на странските сцени успешно ја промовира македонската култура, родољубот Игор Дурловски. На 16 јули, пак, сите заеднички ќе ги засукаме ракавите и ќе ја кренеме нашата држава од пепелта во која што ни ја оставија Заев и СДСМ“, истакна Мицкоски.
Тој ја обвини власта за национално предавство, за криминал и за корупција.
„Заев и СДСМ се доктори на науки за криминал, грабеж, корупција и национално предавство, на 15 јули граѓаните ќе ги испратат овие измамници на темната страна на историјата, а крушевчани имаат најмногу право на ова, бидејќи овде се случувало она организирано востание и пркос за независна македонска суверена држава уште на почетокот на 20. век. Втората работа е криминал и корупција. И третата работа е тоа што го заробуваат судството и обвинителството да се исперат за некои злодела од минатото и да исконструираат некои дела за политичкиот противник, истакна Мицкоски.
Она што овие избори ги прави поразлични, дополни, е тоа што треба, како што рече, да завршиме со експериментите.