Христијан Мицкоски ноќеска по полноќ преку социјалните мрежи призна дека седел во затворен дел на ресторан во скопско Дебар Маало каде на Пазарната инспекција не и беше дозволено да изврши увид, објави „Дојче Веле“.

„Да, точно е дека бев со двајца мои познаници во ресторан во Дебар Маало, прв пат по укинувањето на забраната за посета на угостителските објекти, поради што и не бев информиран доволно за новите протоколи“, напиша Мицкоски на својот Фејсбук профил.

Според новите протоколи за работа на угостителските објекти по укинување на полицискиот час кои владата ги објави на 27 мај годинава е забрането седење во затворен дел на угостителски објекти, односно дозволено е гостите да седат само на тераси и на отворен простор.

„Ако тоа е мојот најголем грев и моја грешка и пропуст, јас тоа го признавам и подготвен сум да платам парична казна поради тоа“, вели Мицкоски.

Но, според информациите од МВР, Мицкоски се соочува со две кривични пријави согласно членовите 205 и 206 од Кривичниот закон – Пренесување заразна болест и Непостапување според здравствените прописи за време на епидемија.

Вработените во угостителскиот објект на улица „Боемска“ најпрво попладнево не и дозволиле на Пазарната инспекција да направи увид во затворениот дел од ресторанот со образложение дека тој е затворен. По два часа инспекторите виделе како од објектот излегува Мицкоски. Потоа случајот доби и политичка нота.

Следуваше вистинска драма која заврши со ангажман на Единицата за брзо распоредување, чии припадници очекуваа налог од јавен обвинител за да ги земат снимките од безбедносните камери во кафеаната.

Мицкоски во својот статус вели дека приказната со неговата улога во инцидентот била наметната за да се прикрие неуспехот на владата во справувањето со епидемијата на коронавирусот.

„Денес вистинската тема е што имаме 101 новозаразен и четири починати лица. Власта сака да продаде приказна за да ја скрие вистината за себе и фактот дека моето одење во ресторан не зарази никого, но нивната неспособност и СДСМ кластерот, да“, пишува лидерот на ВМРО-ДПМНЕ.

За него, целиот случај е доказ дека „власта и параполициските сили диригирани лично од Зоран Заев го следат“.