Претседателот на опозициската ВМРО-ДПМНЕ, Христијан Мицкоски денеска преку видео-обраќање презентираше случај, за кој, како што рече, имаат индиции и сомнеж за постоење на криминал во кој се вмешани компании на луѓе блиски до премиерот.
Според Мицкоски, станува збор за случај каде треба да се вклучи Јавното обвинителство, и да ги провери сите аспекти.
„Компанијата ’СВ Инвест‘ врши превоз на јаглен со товарни возила, но истите возила со струмички регистерски таблици. Сопственик на овие камиони не е ’СВ инвест‘, туку компанијата ’ДГИ Тотал Инженеринг‘, каде сопственик и управител е Вице Заев, братот на премиерот Зоран Заев. Обвинителството треба да провери за колку пари, за која работа, низ каква процедура и во чие име работа вршеле возилата на братот на премиерот и дали и низ каква постапка компанијата на Вице Заев врши услуга чиј краен корисник е државна компанија и зошто неговите камиони се со налепници на друга приватна компанија“, изјави Мицкоски.
Мицкоски во своето обраќање порача дека криминалот и корупцијата сериозно го гушат македонското општество.
„Додека во општеството се наметнуваат теми кои внесуваат етнички поделби, се одвлекува вниманието кон теми од минатото без да се гледа иднината, теми кои служат за колективна хипноза, во реалноста се случуваат сериозни случаи кои отвораат сомнеж за сторен криминал. Македонија се бори со криминален канцер кој го труе општеството и чии пипци навлегуваат во секоја пора. А, изворот на тој канцер стига до највисоките структури на власта“, истакна Мицкоски.
https://www.facebook.com/MickoskiHristijan/videos/959606404214819/