Лидерот на ВМРО-ДПМНЕ, Христијан Мицкоски денеска оствари средба со лидерот на ДУИ, Али Ахмети на која, како што рече, разговарале за две теми – за спорот со Бугарија, но и за предвремените парламентарни избори.
На средбата со Али Ахмети, која траеше еден час, генерално разговаравме на две теми. Едната беше спорот со нашиот источен сосед каде ги повторив нашите тези, принципиелниот став да се почитува резолуцијата усвоена од парламентот. Изразив загриженост од фактот дека колку повеќе ги напуштаме нашите преговарачки позиции, толку повеќе барањата од Бугарија се поголеми и на тој начин се уништува преговарачката позиција на државата, изјави Мицкоски по средбата.
Мицкоски посочи дека цени оти треба да се напушти принципот, како што рече, „на коленичење и сервилност“.
Треба да покажеме карактер и треба да се вложиме максимално сите за да го покажеме тој карактер. Тоа е мојата порака. Доста е веќе од понижување, доста е од срамови, народот е фрустриран. Многу отстапки направи оваа 30-годишна независност, а всушност уште сме во предворјето и не можеме да го почнеме тој процес на преговори, додаде лидерот на ВМРО-ДПМНЕ.
Како што рече, другата тема на која разговарале се предвремените парламентарни избори.
Имајќи ја предвид состојбата во општеството, криминалот и корупцијата нефункционалните институции, недисциплината, лошата економска и енергетска состојба во земјава и уште многу други фактори коишто негативно влијаат, мојот став е дека само со сериозен ресет на системот, многу макотрпна работа и нови луѓе можеме да излеземе од оваа кризна состојба од којашто се наоѓаме, а за тоа се потребни предвремени парламентарни избори, рече Мицкоски.
Според Мицкоски, предвремени парлaментарни избори се потребни час поскоро. Тој напомена дека ВМРО-ДПМНЕ во моментот е најголема пратеничка група со најголем број на грaдоначалници и советници, и како што рече, има политичко право и кредибилитет да бара предвремени парламентарни избори, бидејќи победи на два пати на локалните избори и во првиот и вториот круг убедливо.