ВМРО – ДПМНЕ го промовираше кандидатот за градоначалник на Ѓорче Петров, Александар Стојкоски.

Лидерот на опозициската партија, ВМРО – ДПМНЕ, Христијан Мицкоски, вечерва порача дека неговата партија ќе победи на локалните избори.

– Ова да се локални избори за општината и градот Скопје, но истовремено се избори кои што одлучуваат во каква држава сакате да живееме. Победата на 17 октомври во првиот круг на опозицијата предводена од ВМРО-ДПМНЕ подразбира нова влада… Гласот за Александар и за Данела подразбира нова влада предводена од ВМРО – ДПМНЕ и подобри денови за нашата Македонија, за нашето Скопје и за нашето Ѓорче, рече Мицкоски на промоција на кандидатот за градоначалник на Општина Ѓорче Петров, Александар Стојкоски.

Кандидатот за градоначалник на ВМРО – ДПМНЕ во паркот во Ѓорче Петров пред присутните рече дека е силно мотивиран да работи за сите луѓе, а општината, како што рече, да ја направи функционална.

– Крајно време е да ставиме крај на поделбите, да ставиме крај на лошите одлуки, да ставиме крај на лошите решенија. Јас лично ќе водам позитивна кампања за тоа што силно верувам дека во кампањата треба да бидеме тоа што вообичаено сме. А, јас од тоа нема да отстапам. На моите политички опоненти ќе им посакам добро здравје и достоинствена кампања, рече Стојкоски.

Тој најави заштита и развој на животната средина, како и рестравација на повеќе од 20.000 м2 површина нови паркови низ општината. Стојкоски вети и спортски инвестиции, како нови трим патеки, две трки, реализирање на спортски центар во Хром, нови тениски терени.

Во Ѓорче Петров вечерва беше и Данела Арсовска која е независен кандидат за градоначалник на Град Скопје, а е поддржана од ВМРО – ДПМНЕ.