ВМРО-ДПМНЕ се откажува од користење на средствата кои се предвидени за политичките партии, а кои што понатаму би се користеле за водење на кампања која што би значела за, против или бојкот на претстојното референдумско изјаснување, изјави денеска лидерот на ВМРО ДПМНЕ Христијан Мицкоски, повторувајќи го она што го кажа и вчера.
-Ја користам оваа прилика да апелирам и до владата средствата да ги пренамени за реконструкција и изградба на гимназијата „Кирил Пејчиновиќ“ во Тетово. Но, истовремено еве да упатам апел до колегите од другите политички партии да не ги користат средствата коишто се предвидени, и истите да ги пренаменат за други цели коишто ќе бидат неопходни за решавање на вистинските проблеми на граѓаните. Еве апелирам и до пратеничката група на СДСМ и до останатите политички партии коишто се дел од владината коалиција да ги пренаменат средствата, наместо да ги користат во ваква стерилна кампања во која што ќе се обидат лагата да ја претстават како вистина, капитулацијата како победа, изјави Мицкоски за време на денешната посета на Лесновскиот манастир.
Тој рече дека кампањата што почнува од 10 септември ќе ја водат преку таканаречен нов политички волонтеризам со голем број на волонтери ширум Македонија.
-Ќе се обидеме на граѓаните, без да ги трошиме нивните со мака стекнати пари да можеме да им објасниме на граѓаните за штетните последици од овој капитулантски договор кој што го потпиша владата на СДСМ и Зоран Заев, но, истовремено да се обидеме да го зачуваме достоинството на македонскиот народ и македонската држава, изјави Мицкоски.
Претседателот на Собранието Талат Џафери во петокот достави известување до пратеничките групи во кое бара во рок од три дена да одговорат дали ќе учествуваат во јавната пропаганда за референдумот која треба да ја спроведе Собранието, како и за тоа каква кампања ќе водат, дали ќе бидат „за“ или „против“ референдумското прашање.
Известувањето е упатено до координаторите на пратеничките групи на СДСМ, ДУИ, ВМРО-ДПМНЕ, Беса, како и до пратениците на ДПА и Алијансата за Албанците.
Џафери истовремено ги информира пратениците дека по барање на Собранието, Владата донела одлука и одобрила да му се обезбедат средства на Парламентот во висина од 80 милиони денари.
Рокот од три дена Џафери им го дава на координаторите на пратеничките групи за да го известат дали ќе учествуваат во јавната пропаганда и за тоа дали ќе водат кампања „за“ или „против“ референдумското прашање заради планирана и соодветна распределба на овие средства за реализација на јавната пропаганда.
Само пратеникот Антонијо Милошоски од ВМРО-ДПМНЕ во петокот соопшти дека со допис го известил Претседателот на Собранието Џафери дека ќе учествува во јавната пропаганда на претстојниот референдум со бојкотирачки став.
Но од Собранието му одговорија дека парите што се издвоени за кампања нема да се делат на секој пратеник одделно, туку Собранието ќе закупи медиумски простор пропорционално врз основа на бројот на вкупниот број на пратеници кои ќе се изјаснат „за“ или „против“.