Ако имаме двотретинско мнозинство во македонското Собрание, како единствен начин за создавање на можност за чекор назад со Преспанскиот договор, ќе го сториме тоа, порача лидеот на ВМРО ДПМНЕ, Христијан Мицкоски за емисијата „Утрински брифинг“ на Слободна ТВ.
Мицкоски во разговорот, покрај за Преспанскиот договор, ги повтори ставовите и во однос на Договорот за добрососедство со Бугарија. Тој го потврди отстранувањето на сликите со поранешниот претседател, Никола Груевски во партиското седиште, меѓутоа нагласи дека се отстрануваат и други на чии места се поставуваат ликови и содржини кои оставиле белег низ историјата.
Тоа, според лидерот на ВМРО ДПМНЕ, не значи дисконтинуитет од времето на политиките на Груевски бидејќи, како што изјави, партијата е веќе реформирана и обединета.
Опозициската ВМРО ДПМНЕ вчера во СЦ „Јане Сандански“ го одржа последниот партиски собир. Мицкоски пред присутните граѓани излезе со ветување за милијарди евра инвестиции за подобар и поквалитетен живот доколку неговата партија со коалицијата „За Обнова на Македонија“ извојува победа на вонредните парламентарни избори на 12 април.