Претседателот на ВМРО ДПМНЕ Христијан Мицкоски смета дека постои политичка концесија на премиерот Заев во поглед на прашањето на законот за јазици и изразува жалење што за вакво крупно прашање не се земаат предвид аргументите и фактите, туку, како што вели во денешното обраќање до јавноста, се погазува Уставот и по секоја цена се обидува да се донесе закон кој не е уставен.
-Не е возможно законот да се донесе по демократски пат, а без притоа да се прекрши Деловникот на Собранието и не се изврши упад во процедурите, бидејќи ние (ВМРО-ДПМНЕ) нема да отстапиме од единствениот начин на покажување на демократски пркост а тоа се 36-те илјади веќе поднесени и прифатени амандмани. Бидејќи ваков клучен закон се настојува да се донесе без дебата и разговор со опозицијата, да се игнорираат забелешките од претседателот на државата, само за да се задоволат одредени политички апетити јасно е за каков случај на пазарење на сметка на уставот и законот имаме, вели Мицкоски.
Тој уште еднаш повтори дека ќедадат поддршка во обезбедувањето на парламентарно мнозинство, и стабилноста на владата само, како што вели „ да не потпаѓа под уцените кои се на штета на државата, и да не го донесе неуставниот закон“.
Мицкоски потенцира дека ВМРО-ДПМНЕ „стои на располагање да учествува во изработка на законско решение кое е уставно, практично и применливо“.
Премиерот Заев, денеска, одговарајќи на новинарско прашање, најави дека неделава ќе биде донесен Законот за јазици и дека парламентарното мозиннство е стабилно и ќе расте.