Меѓународниот монетарен фонд (ММФ) објави дека постигнал договор со Украина за финансирање во вредност од 15,6 милијарди долари.
Првиот заем се очекува да биде одобрен во наредните недели.
Тоа би бил и еден од најголемите финансиски пакети што Украина ги добила од почетокот на руската инвазија.
ММФ неодамна го промени правилото за да дозволи заеми на земјите кои се соочуваат со „исклучително висока неизвесност“.
„Руската инвазија на Украина продолжува да има разурнувачки ефект врз економијата: активноста е намалена за 30 отсто во 2022 година, голем дел од капиталот е уништен, а нивоата на сиромаштија се зголемуваат“, рече претставникот на ММФ, Гевин Греј.
Програмата е дизајнирана во согласност со политиката на новиот фонд за кредитирање во услови на исклучително висока неизвесност, а се очекуваат силни финансиски гаранции од донаторите, вклучително и Г7 и ЕУ, соопшти ММФ.
Греј, исто така, рече дека договорот ќе „мобилизира концесиско финансирање од големи размери“ за Украина од меѓународни донатори и партнери. Средствата сè уште треба да бидат одобрени од извршниот одбор на ММФ.
ММФ очекува оваа година украинската економија да забележи благ пад или раст.
Украинскиот премиер Денис Шмихал рече дека финансирањето ќе и помогне на земјата „да ги финансира сите критични расходи и да обезбеди макроекономска стабилност и да ја зајакне нашата интеракција со другите меѓународни партнери“.
Американскиот министер за финансии Џенет Јелен, која беше во ненадејна посета на Украина минатиот месец, рече дека амбициозната и соодветно условена програма на ММФ е клучна за поддршка на реформските напори на Украина.
САД се најголемиот акционер на ММФ и најголемиот придонесувач за Украина во однос на потрошените пари.
Претходно оваа година, претседателот Џо Бајден најави речиси половина милијарда долари повеќе воена помош на САД за Украина.