Jавното соопштување крајни позиции во пресрет на посетaта на специјалниот пратеник на ОН, Метју Нимиц, со чие посредство се одвива процесот на разговори за името, може да го намали просторот за разговори, велат за МИА од кабинетот на шефот на министерот за надворешни работи, Никола Димитров.
-Од наша страна има добра волја за заемно прифатливи решение кое ќе ги почитува интересите, достоинството и идентитетот на двата народа. За да дојдеме до решение ќе биде нужна добра волја и од другата страна, велат од МНР.
Реакцијата на македонското МНР доаѓа по синоќешното интервју на грчкиот министер за надворешни работи Никос Коѕијас на државната телевизија ЕРТ, во кое најави дека Грција во февруари ќе и достави на Македонија спогодба во четири точки, што според Атина треба да биде основата за решавање на прашањето за името и отворање на патот на Македонија кон НАТО и ЕУ.
Медијаторот Метју Нимиц е во Атина каде што денеска имаше средба со шефот на грчката дипломатија Коѕијас, по што утре ќе пристигне во дводневна посета на Македонија.
Во меѓувреме, заменик портпаролот на Обединетите нации Фархан Хак изјави дека „е создаден позитивен момент“ во разговорите што се водат со посредтсво на ОН и оти е можно да биде пронајдено решение со, како што изјави, „вистински дух на компромис од раководствата и од народите на двете земји“.