Исмаил Морина (35) повторно е топ тема во регионот. Осомничениот „пилот“ на дронот за време на натпреварот меѓу репрезентациите на Србија и на Албанија беше уапсен од хрватска полиција во јуни врз основа на потерница што ја издадоа српските власти, а судот во Дубровник сега одобри негова екстрадиција во Белград. Инцидентот со леталото со провокативна содржина (карта на „Голема Албанија“), се случи во октомври во 2014 година и беше иницијална каписла за немили сцени на стадионот на Партизан и прекин на фудбалската претстава во рамки на квалификациите за ЕП 2016.
Веста за судската одлука во Дубровник ја крена на нозе официјална Тирана и цела Албанија. Фудбалската федерација на западниот сосед (ФШФ) ја повика владата „да интервенира во рамки на правниот контекст и да спречи испорачување на Морина во Србија“. Притоа се обрати и до неговото семејство дека ќе продолжи да се бори во намерата да не дозволи да заврши во Белград.
„Во целост сме посветени во искористување на сите институционални механизми и правни патишта“, се вели во соопштението на ФШФ.
Последните случувања го привлекоа вниманието на западните медиуми. „Асошиејтед прес“ пишува и за повикот на навивачите на собир вечерва во Тирана за вршење притисок врз албанската Влада за вклучување во случајот. Агенцијата воедно наведува дека Морина е по потекло од Кукс, град на североисток на земјата, дека живее во Италија и дека често ги следи гостинските настапи на фудбалската репрезентација на Албанија.
Жалење за недоволна ангажираност на Владата на Албанија во случајот со Морина изрази и неговиот брат Џеваир кој во изјавата за ТВ „Репорт“, меѓудругото, истакна дека „животот на Исмаил би бил загрозен во Србија“.
„Ја повикуваме албанската Влада да интервенира и спречи екстрадиција во Србија. Ние, како фамилија, ќе сториме нешто радикално што ќе биде изненадувачко за сите“, порача Џеваир Морина без притоа да објасни на што конкретно мисли.
Според албанските медиуми, министерството за правда веќе побарало Морина да не биде испорачан на Белград како и за вклучување на премиерот Еди Рама за кој се пишува дека е во постојат контакт со хрватските власти за решавање на случајот.