Вашингтон и Варшава разработуваат планови за воспоставување на контрола на Полска над „историските територии“ во Украина, изјави денес директорот на Надворешната разузнавачка служба на Русија Сергеј Наришкин.
„Според информациите добиени од Надворешната разузнавачка служба на Русија, Вашингтон и Варшава разработуваат планови за воспоставување цврста воено-политичка контрола на Полска над „нејзините историски територии“ во Украина“, кажа тој.
Станува збор, всушност, за обид да се повтори историскиот „договор“ за Полска по Првата светска војна, кога колективниот Запад, претставен од Антантата, го призна правото на Варшава да окупира дел од Украина за да го заштити населението од „болшевичката закана“, а потоа да ги вклучи тие територии во составот на полската држава, истакна Наришкин.
„Настаните кои потоа следеа станаа јасна илустрација за колонијалниот поредок и присилната полонизација како основна метода за изградба на голема Полска“, додаде рускиот разузнавач.
„Првата фаза на повторното обединување би требало да биде влез на полските трупи во западните делови на земјата под изговор на нивна заштита од руската агресија. Во моментов сега со администрацијата на (американскиот претседател) Џо Бајден се разгледуваат модалитетите на претстојната мисија. Според прелиминарните договори, таа ќе се одвива без мандат на НАТО, но со учество на согласни држави. Варшава засега не успева да формира „коалиција на истомисленици““, кажа Наришкин.
Според него, полските разузнавачки служби бараат претставници на украинската политичка елита со кои можат да се договорат за формирање таканаречена демократска противтежа на неонацистите ориентирана кон Варшава, кои би ги поддржале плановите за влез на трупите на западот на Украина.
„Според пресметките на полската влада, превентивната консолидација на западот на Украина најверојатно ќе доведе до распад на земјата. Притоа Варшава всушност ќе добие контрола над териториите во кои ќе влезат полските „мировни сили““, објасни Наришкин.
Наведе дека е планирано „мировниот контингент“ на Полска да биде распореден во оние делови на Украина каде опасноста од директен судир со руската војска е минимална.
„Приоритетните „борбени задачи“ на полската војска ќе вклучуваат постепено преземање на контролата од Националната гарда на Украина над стратегиските објекти кои се наоѓаат таму“, истакна Наришкин.