Интензивно се следи ситуацијата со Ковид-19 во соседството и ако се воочи ризик за трансмисија на вирусот во нашата земја и загрозување на македонскиот здравствен систем, не е исклучено да се воведат рестриктивни мерки за границите. Ова го нагласи министерот за здравство Венко Филипче на денешната прес-конференција и, пред сè, се однесува на границите кон Србија и кон Косово каде епидемиолошката состојба во последните неколку денови е влошена.
За тоа, како што потенцира Филипче, се разговарало и викендот и претпладнево на Комисијата за заразни болести, но и со епидемиолози од неколку градови во јужна Србија. За дефинитивната одлука за границите, ќе се причека на информациите од терен.
„Можно е да предложиме некои мерки, во случај да процениме дека ризикот од влегувањето на граѓаните на овие земји во нашата земја може да го загрози нашиот систем. Денеска ја продолжуваме дискусијата, најверојатно и во текот на утрешниот ден. За време на викендот немаше некоја индикација за некоја голема опасност, но пак ќе кажам дека чекаме информации од повеќе градови и од Косово и од Србија“, изјави Филипче.
Тој додаде дека во изминатите десет дена кризата со Ковид-19 повторно ескалира насекаде на Балканот. Според официјални податоци, во Србија во последните седум дена се бележат по 300 случаи на ден, во Бугарија над 150, во БиХ над 170, во Хрватска 86, во Црна Гора 57, во Албанија речиси 70 и во Косово над 100 случаи.