Жозе Мурињо го пецна Арсен Венгер пред утрешното дерби меѓу Манчестер јунајтед и Арсенал на „Олд Трафорд“ во рамки на 11 коло во Премиерлигата. Португалецот изрази незадоволство што не е почитуван доволно во споредбите на британските медиуми со неговиот француски колега. Познато е дека двајцата менаџери не се „мирисаат“, нетрпеливоста меѓу нив е повеќегодишна и датира од првиот мандат на „специјалниот“ во Челзи во периодот 2004-2007 година.
„Рекордот против било кој тренер не е важен. Единствено важно за мене е што ќе освоите како тим. Нашите резултати се наша препорака. Утре се игра меч во Премиерлигата на два тренера со рекорди. Алекс Фергусон повеќе не е овде. Мислам дека станува збор за шест или седум титули. Јас имам три, тој има три или четири, не знам точно“, изјави Мурињо на официјалната прес-конференција пред натпреварот. Патем, Венгер нема победено ниту еден тим на Мурињо во Премиерлигата.
Мурињо беше шампион со Челзи во сезоните 2004/05, 2005/06 и во 2014/15, а Венгер со Арсенал во сезоните 1997/98, 2001/02 и 2003/04.
„Дали тоа значи дека треба да нè почитуваат и во периоди кога резултатите не се најдобри? – Мислам дека господин Венгер ја има почитта на медиумите и мислам дека јас ја немам. Посебно што последната титула ја освоив пред 18 месеци, а не пред 18 години. Но, јас го следам својот пат и сакам четврти трофеј во Премиерлигата“, рече Португалецот.
За периодот по отказот во Челзи нагласи дека имал бројни понуди, но и дека не сакал да избрзува во исчекување на вистинската.
„Сега сум во клубот во кој сакам да бидам. По отказот во Челзи не бев во неволја. Напротив. Имав многу понуди меѓутоа не зборам за нив бидејќи тоа е прашање на принцип. Можев веднаш да најдам работа во некој од најголемите клубови во Европа, но чекав. Освојував шампионски титули со четири различни клуба и сакам да бидам првак со секо клуб во кој работам. Би бил убав подвиг ако успеав во тоа и со Манчестер јунајтед“, заклучи „специјалниот“.