Стадионот „Амекс“ во Брајтон како проколнато место за фудбалерите на Манчестер јунајтед. По триумфот во минатата сезона со 1:0, „морските галеби“ славеа над великанот од „Олд Трафорд“ и во тековното издание на Премиерлигата. Конечни 3:2 за тимот од јужниот брег на Англија што, секако, ќе придонесе да „пука“ од самодоверба во соблекувалната на Крис Хатон за мечевите што ќе следуваат.

„Казнети сме за грешките што ги правевме. Тоа е за мене приказна од натпреварот. Правевме неверојатни грешки во поедини моменти, грешки што нè убија. Пред се кај третиот гол. Се почувствувавме позитивно по 2:1, но третиот примен гол пред одморот дефинитивно нè уби. Нашиот втор погодок беше постигнат предоцна“, рече Жозе Мурињо по мечот.

Манчестер јунајтед одигра под нивото во првото полувреме. Особено во одбрана, имаа проблеми при поседот на топка, забележаа голем број на погрешни додавања и како резултат на тоа заминаа на пауза со три гола во мрежата на Де Хеа што е трет случај во клупската историја на 20-тниот англиски првак.

„Ме критикуваа во мината сезона во која критички бев настроен кон тимот и отворено ги коментирав настапите на фудбалерите. Научив од мојата реалност и од сега ќе бидам отворен само кога им оди добро. Не можам да ја критикувам желбата на моите играчи“, додаде „специјалниот“.

Португалецот се обиде со замени во вториот дел да ги придвижи нештата во својата екипа, но ништо чувствително не донесоа неговите замисли на терен.

Премиерлига, 2 коло

Брајтон – Манчестер Ј. 3:2

Манчестер С. – Хадерсфилд 6:1

Барнли – Вотфорд 1:3

Челзи – Арсенал 3:2

Евертон – Саутемптон 2:1

Лестер – Вулверхемптон 2:0

Тотенхем – Фулам 3:1

Вест Хем – Борнмут 1:2

Кардиф – Њукасл 0:0

Кристал Палас – Ливерпул (понеделник, 20.45 ч.)

Табела: Манчестер сити 6, Челзи 6, Вотфорд 6, Тотенхем 6, Борнмут 6, Евертон 4, Ливерпул 3 (-1), Кристал палас 3 (-1), Лестер 3, Манчестер јунајтед 3, Брајтон 3, Њукасл 1, Саутемптон, Вулверхемптон 1, Барнли 1, Кардиф 1, Арсенал 0, Фулам 0, Весет Хем 0, Хадерсфилд 0.