Прекарот „посебен“ го доби поради неговото фудбалско знаење и менаџерски вештини со поединци и екипи што ги водел, поради неговиот карактер што на моменти на површина знае да исфрли препотентност и надменост, поради тоа што нема влакно на јазик кога говори за некого или нешто. Жозе Мурињо е „посебен“ и поради смислата за хумор што ја има и на своја и на туѓа сметка.
Португалецот денеска свика прес-конференција пред дерби дуелот меѓу Манчестер јунајтед и Ливерпул во Премиерлигата што се игра викендот (недела, 17 ч.). Пред него исправени камери, фото-апарати на готовс и на масата покрај многубројните микрофони и диктафони беше оставен и мобилен телефон на новинар на „Talk sport“ во функција да го снима обраќањето.
Говорот на Мурињо во еден момент го прекина повик на телефонот. Менаџерот на „црвените ѓаволи“, без размислување, го зема апаратот и одговори на повикот што наиде на насмевки меѓу присутните.
„Ало“, изусти Португалецот и откако го слушна непознатиот глас од другата страна се обрати пред присутните:
„Почекајте за момент, ве молам, Аби од „Talk sport“ е“, барајќи го со поглед сопственикот на мобилниот телефон за да преземе. Новинарот го зема телефонот, одговори дека не може да зборува, го прекина повикот и му се извини на Мурињо.