Жозе Мурињо се шокира од состојбата на теренот во Ростов каде неговиот Манчестер јунајтед утревечер ќе игра со истоимениот руски домаќин во првиот осминафинален дуел во Лига Европа. Евентуално освојување на натпреварувањето е виза за Лигата на шампиони. И за тоа се свесни „црвените ѓаволи“ како што се свесни дека позицијата што води до европската клупска елита преку Премиерлигата е шест бода далеку од нив во моментот и може да остане недостижна до крајот.
Згора на тоа имаат незгоден противник кој знае да биде опасен. Португалецот знае дека во Ростов загуби и Баерн Минхен оваа сезона и знае дека истата судбина може да му се случи и на Манчестер Ј. на тревникот со лош квалитет.
„Тешко ми е да поверувам дека ќе играме на таков терен ако воопшто и може да се нарече тере. А, знам дека мораме“, рече Мурињо.
Русите како да претчувствутува дека „специјалниот“ ќе изнесе забелешки за кондицијата на тревникот пред натпреварот, но Португалецот не запре на тоа.
„Ќе мора да размислам кој ќе игра бидејќи очекував терен на кој може да се игра. Летоска во Кина на сличен терен со Манчестер сити решивме да не играме. Сега изгледа ќе мораме“, коментира Мурињо.
Португалецот притоа имал разговор и со еден од луѓето од УЕФА. Дел од содржината на разговорот изнесе во јавност.
„Кога му спомнав за проблемот со теренот ми рече дека фудбалерите се осигурани и ако нешто се случи ќе немам проблеми“, заврши менаџерот на Манчестер јунајтед.