Еколошката такса е погрешна мерка во погрешно време, оцени Тимчо Муцунски, пратеник на ВМРО-ДПМНЕ, во изјава за медиумите. Предлог-законот мина на последната владина седница и беше проследен на усвојување до Собранието, но опозициската партија денеска јасно, како што велат од таму, порача – „без двоумење ќе го блокираме“.
– Користејќи ги сите постоечки демократски механизми, ќе го спречиме неговото донесување. Во случај мнозинството да продолжи да го прави тоа што го прави најдобро, а тоа е насилно и надвор од процедура да донесе уште еден закон кој удира по џебот на граѓаните, тогаш приоритет на новата влада на ВМРО-ДПМНЕ ќе биде целосна ревизија на сите анти-пазарни политики, меѓу кои и високите даноци, нагласи Муцунски.
Муцунски ја обвини владата на СДСМ и на ДУИ за отсуство на опипливи политики во насока на заштита на животната средина и здравјето на граѓаните.
– Наместо тоа, предлагаат воведување на еколошка такса, која ја затскрива реалноста дека истата се воведува како форма на кризен данок. Наместо државата да се грижи за инвестиции во зелени проекти, Владата има намера да наплаќа од секој граѓанин и од секоја компанија, со цел да финансира проекти што нема да постигнат некој значителен ефект, освен можеби политички да го оправдаат ребрендирањето на еден од своите коалициони партнери, наведе членот на пратеничката група на ВМРО-ДПМНЕ.
Неговата партија, вели тој, ќе нема задршка во однос на потребата за адресирање на современите еколошки предизвици, но за тоа истакна дека постојат редица на прифатливи начини, други финансиски инструменти и соодветни мерки.
– Вo овој тежок кризен период не смееме да дозволиме најсилно да бидат оштетени граѓаните и стопанските субјекти. Токму oвој владин предлог за воведување на нова давачка со која практично се зголемуваат цените на горивата за граѓаните, со сигурност ќе влијае за нов бран на зголемување на цените на транспортот и на сите други производи, зголемена неконкуретност на македонските компании на светскиот пазар, за да во овие кризни времиња има потенцијал да предизвика и дополнителен шок на целата македонска економија. Ваквиот Предлог-закон е силен доказ и за антипазарниот пристап на Владата, на која од самиот почеток и недостасува сериозен и остварлив концепт за борба против сиромаштијата, засилен економски развој и барем минимално подобрување на животниот стандард на граѓаните, истакна Муцунски.