Машкиот тениски карван е моментно активен на две дестинации. Заедничко за двете е што се наоѓаат на азискиот континент и што се категоризирани во серијата 500. Едниот турнир се игра во Пекинг, другиот во Токио. И додека Енди Мареј е четврт-финалист во Кина, а Новак Ѓоковиќ во Јапонија, Роџер Федерер и Рафаел Надал одмораат пред завршницата на сезоната.
Гренслемите минаа, од Мастерсите останаа уште два (во Шангај почнува на 7 октомври, во Париз на 28 октомври) пред финалето во Лондон (11 ноември) и во отсуство на поважни турнири во овој период, се впуштивме во потрага по музичките вкусови на тениските асови од Србија, Велика Британија, Швајцарија и Шпанија, односно, што слушаат или со што знаат да се опуштат во слободно време во рамки на подготовки.
Новак Ѓоковиќ често знае во слушалки да има песни од белградската поп и денс група Тап 011. Знае да се провесели и со народна музика, а летото покажа дека нема проблем да запее и со хрватски клапи додека дел од одморот го минуваше на Корчула.
Роџер Федерер слуша хитови од Бекстрит Бојс, го обожува Лени Кравиц. Во еден период од кариерата знаеше да другарува и со Металика и АЦ/ДЦ поради тренер во тимот кој беше рокер.
Рафаел Надал ја обожува Шакира. Енди Мареј го сака Џастин Бибер, Ед Ширан, Фарел и Џон Фаренкамп. Марин Чилиќ, меѓудругите, е почитувач на Марко Перковиќ Томпсон кој дури му свиреше при дочекот по освојување на Ју-Ес опен.