Ангела Меркел мина 16 долги години како канцелар на Германија, една од најбогатите земји на Стариот континент. Земјата во овој период се подготвува за проштална забава на челичната канцеларка која со децении ја обликуваше европската политичка сцена.
Меркел за својата прослава го избра омилениот бенд, кој ќе ги свири нејзините три омилени песни. Церемонијата ќе се одржи во четврток, а на неа ќе присуствуваат „само“ 200 гости поради пандемијата на коронавирус. Меѓу нив ќе има и 52 министри од претходните четири влади на чело со Меркел.
Иако со децении е една од главните фигури на политичката карта на Европа, Меркел успеа да ја изненади јавноста. На нејзината проштална забава ќе свири оркестарот на Бундесверот, кој ги изведува нејзините омилени песни. Една од желбите на канцеларката во заминување е песната „Заборавивте филм во боја“, која во 1973 година ја испеа Нина Хаген, позната како „мајката на панкот“.
Втората песна во избор на „Меркијавели“ е „Црвените рози треба да паднат“ во изведба на иконата на германската музичка сцена Хилдегард Кнеф. Третата музичка желба на Ангела Меркел е „Свети Боже, го славиме твоето име“, екуменистичка христијанска песна од 18 век.
Изборот на канцеларката ги воодушеви граѓаните со оглед на тоа што нејзините претходници избраа повеќе класични песни. Герхард Шредер сакаше да ја слушне „Мојот пат“ на Френк Синатра, додека пред него Хелмут Кол ја напушти функцијата во ритамот на Бетовеновата „Ода на радоста“.
Меркел наскоро ќе ја предаде канцеларската функција по долги 16 години. Нејзиниот наследник Олаф Шолц доаѓа од редовите на социјалдемократите, а функцијата министер за финансии ја извршуваше во последната влада на чело со Меркел. Таа е на чело на техничката влада од изборите одржани во септември. Олаф Шолц се очекува да ја преземе функцијата до 8 декември, што ќе го означи конечниот крај на владеењето на Ангела Меркел.