Министерот за внатрешни работи Оливер Спасовски денеска изјави дека МВР работи на тоа да им се влезе во трага на поранешниот началник на Петтата управа Горан Грујевски и на Никола Бошковски кои се обвинети во случаите „Таргет“ и „Тврдина“ на СЈО.
– Со оглед на истрагата и на постапките, не можеме да излегуваме со детали, меѓутоа сите информации коишто ги имаме заедно со Специјалното јавно обвинителство, кое е надлежно за овој случај, работиме на тоа да ги обезбедиме овие две лица за органите на прогонот и да може да продолжи постапката која што е поведена во овој случај, истакна Спасовски, додавајќи дека немаат сознанија дали Грујевски или било кој друг обвинет во случајот имаат двојно државјанство.
Вчера Фокус објави дека голема е веројатноста Горан Грујевски, екс началникот на Петтата управа во УБК, да се крие во Босна и Херцеговинасо објаснување дека Грујевски е роден во Босна, поради што поседува и босанско државјанство.
Екс началникот заедно со Никола Бошковски, вработен во УБК, веќе 36 дена се во бегство, откако Апелациониот суд им одреди притвор, како обвинети во случајот на СЈО, „Таргет и Тврдина“.
Во јавноста се шпекулираше дека бегалците се кријат во Албанија, Фокус повикувајќи се на извори во МВР објавува дека „не постои сомнеж дека се засолнети во оваа соседна држава“.
Телевизијата 21 неодамна објави дека Грујевски имал уште еден идентитет под името Владимир Варелов. Според извори на телевизијата, Интерпол е известен за ова име под кое наводно сега се претставува Грујевски.
Меѓународната потерница за двајцата е распишана на 26 јуни, откако полицијата не успеа да ги пронајде и спроведе во притвор по одлуката на Врховен.
Грујевски е обвинет за кривичните дела „Злосторничко здружување“, „Злоупотреба на службена положба и овластување“, „Фалсификување службена исправа“, а Никола Бошкоски се товари за кривичните дела „Злоупотреба на службена положба и овластување“ и „Фалсификување службена исправа“.