Лидерите на опозициските партии Зоран Заев од СДСМ, Фијат Цаноски од ПЕИ, Самка Ибраимовски од ПЦЕР и нивните сопартијци заедно со „шарените“ демонстранти вечерва со боја ја торпедираа фасадата на Министерството за правда во знак на солидарност кон граѓаните кои се повикуваат на распити за прекршоци сторени за време на протестите.
-Овој перформанс на сите нас хулиганите и хулиганките, составен дел на Шарената револуција беше чин на солидарност кон сите овие другари и другарки кои се под мечот на неправдата и репресијата од страна на оваа власт за да споделиме повеќе илјади граѓани, вклучително и нас лидерите на политичките партии на понесување на одговорноста на фарбање на институциите кои се веќе делигитимирани во Република Македонија. Нека не казнат сите нас, сите кои не гледате како претседатели на партиите, а се илјадници на број. Не може да не казнат, не може да не заплашат. Секој нивен чекор на запшување, значи охрабрување на граѓаните. Влегуваме во финале и бегање нема, секој мора да одговара во Македонија, рече Заев.
Демонстрантите на Шарената револуција денеска доброволно потпишуваа писмени изјави дека учествувале во боењето на институциите, а воедно одобруваа и полномоштво за нивно застапништво од адвокатот Ѕвонко Давидовиќ кој им понуди бесплатна правна помош во текот на распитот за наводните прекршоци.
Активистката Ирена Стеријовска која утринава беше повикана на распит во полициската станица Беко, на денешниот протест порача дека заплашување е погрешна тактика.
-Ова другари е системна грешка. Шарената револуција обележувала и ќе продолжи да обележува се што е грешка во овој систем, затоа ќе им порачам со заплашувањата сте грешка, со Собрание сте грешка, со Министерство за правда сте грешка, со Уставниот суд сте грешка, со Министерство за култура сте грешка и тоа не знаете каква. Грешка сте со цела Владата и сите послушници ќе одговарате, рече Стеријовска.
Освен Министерството за правда, во боите на Шарената револуција повторно беше обоено и Собранието на Република Македонија. Додека припадник на МВР го снимаше протестот, се повеќе граѓани за првпат ракуваа со катапултот и го шараа законодавниот дом, дофрлувајќи му на полицаецот „Снимај бе братучед“.
Граѓаните обединети под Шарената револуција бараат повлекување на одлуката за аболиција и оставка на претседателот Ѓорѓе Иванов, формирање на специјално одделение на Кривичниот суд за предметите на Специјалното јавно обвинителство, оставка на Владата предводена од ВМРО-ДПМНЕ и ДУИ, како и итно ослободување на притворените демонстранти. Дел од барањата се и вклучување на граѓанското општество во решавање на кризата и формирање на преодна влада.
Се до исполнување на овие барања, тие најавуваат дека нема повлекување од улица.