Центарот за јавно здравје во Скопје, заедно со Институтот за јавно здравје подготвува план за скрининг на лица за кои се смета дека спаѓаат во критични категории како здравствени работници, вработени во градинки, вработени во домови за згрижувањена стари лица, припадници на полиција, возачи во ЈСП и таксисти, вработени во јавни служби (шалтерски работници), пациенти пред хоспитализација, се вели во соопштението на Министерството за здравство (МЗ).
Со скринингот кој ќе се прави со PCR тестови, се појаснува во дописот, ќе се овозможи поквалитетна проценка за можноста за олабавување на рестриктивните мерки, но и значително ќе се зголеми бројот на тестови. Во текот на следните денови ќе биде готов новиот алгоритам и ќе се дефинира таргетираниот број на тестови што ќе се прави на дневна основа. Кластерите по возраст и хронични болести, според МЗ, би биле опфатени со испитувања во натамошниот период, за да се види прокуженоста на населението од овој вирус. Матичните доктори ќе го добијат новиот алгоритам и преку „МојТермин“ ќе закажуваат тестирање на одреден број лица според можностите на системот на дневна база.
Брисевите, истакнуваат од Министерството за здравство, ќе се земаат во постојните пунктови и ќе ги транспортираат Центрите за јавно здравје во претходно одредени лаборатории.
„Стратегијата од почетокот на епидемијата беше да се тестираат пациенти со симптоми и согласно оваа стратегија работевме целиот овој период. Таа даде исклучително добри резултати без да ги оптовари капацитетите за тестирање и за хоспитализација што беше наша примарна цел. Тоа што во изминатите денови имаме намален број на тестирања е доказ дека бројот на активни пациенти во нашата земја значително се намалува што уште еднаш ја потврдува успешноста на досегашните чекори“, се заклучува во соопштението на МЗ во кое уште еднаш се отфрлаат обвинувањата на опозицијата за намален број на тестови во политички цели. Тестирањето ќе продолжи по новата методологија и согласно препораките на епидемиолозите.