Специјалното јавно обвинителство (СЈО) на денешното судско рочиште за споениот предмет „Таргет – Тврдина“ побара издвојување на постапката за поранешниот началник на Петтата управа во МВР Горан Грујевски и вработениот во УБК Никола Бошкоски, кои се во екстрадициски притвор во Грција.
На ова се спротивстави нивниот адвокатот Петар Василев, а судот по кратката пауза одлучи дека дополнително ќе се произнесе за барањето на Василев. Судиите ќе ја чекаат одлуката на Врховниот суд во Атина која треба да биде соопштена на 18 мај.
Покрај Грујевски и Бошковски во случајот „Таргет – Тврдина“ обвинети се и поранешната министерка за внатрешни работи Гордана Јанкулоска, поранешниот директор на УБК Сашо Мијалков, како и поранешниот шеф на неговиот кабинет, Тони Јакимовски.
Сите се товарат дека преку три системи за следење на комуникациите во Управата за безбедност и контраразузнавање (УБК), во периодот од 2008 до 2015 година незаконски биле следени 4.286 телефонски броеви за кои воопшто не биле издадени судски наредби. Комуникацијата била следена пред да бидат издадени и по завршување на траењето на важноста на судските наредби на 1.541 број или вкупно 5.827 телефонски броеви. Прислушувани биле над 20 илјади граѓани.
Следното рочиште е закажано за 19 јуни.