На новинарот Зоран Божиновски ќе му се суди во предметот „Шпион“, информира денеска на рочиштето за овој предемт, што го презеде СЈО, судијата Владимир Туфегџиќ. Одлуката ја донесла судијката која досега му судела на Божиновски.
Божиновски е осомничен во случајот „Шпион“, но постапката за него беше раздвоена поради тоа што им беше недостапен на органите на прогон. Тој се товари дека ги сторил делата: злосторничко здружување од чл. 394 ст. 2, шпионажа од чл. 316 ст. 3 в.в со чл. 45 од КЗ и кривично дело уцена од чл. 259 ст. 2 в.в ст. 1 в.в со чл. 19 д КЗ.
Барањето за спојување на предметите, пак, го поднесе Специјалното јавно обвинителство (СЈО), кое што ја превзеде наделжноста за двата случаја.
Туфегџиќ му даде задолжение на СЈО да го прецизира обвинителниот акт и тоа до наредното рочиште закажано за 17 мај.
Уредникот на порталот „Буре весник“, Зоран Божиновски беше уапсен на 21 април во Нови Сад и екстрадиран во Македонија. Божиновски беше уапсен по барање на српското министерство за правда по меѓународната потерница која беше распишана против него, како осомничен во случајот „Шпион“, и беше во притвор од 22 април истата година.
Во јули 2016 против него беше поднесено обвинение поради постоење на основано сомнение за кривичните дела злосторничко здружување , шпионажа и уцена.
СЈО уште во август 2016 го побара предметот од ОЈО, но од Јавното обвинителство со кое тогаш раководеше Јован Илиевски воопшто не им одговораа.
Кривичниот суд во Скопје лани во јули го ослободи од притвор Божиновски, мерката притвор е заменета со друга мерка на претпазливост.
Тој повеќе пати во јавноста обвини дека случајот кој се води против него е наместен и монтиран заради неговото известување и критички објави кон власта.
Апелацискиот суд лани ги ублажи казните на обвинетите и ја преиначи првостепената одлука на Кривичниот суд, но за дел од 18-те обвинети, меѓу кои е се и Маријан Ефремов и Горан Стојков, дел од постапката е вратена од почеток.
Во случајот „Шпион“ кој е од 2013 година, осудени се 18 лица за злосторничко здружување, шпионажа, уцена, измама и недозволено поседување оружје.