Иако не беа на дневен ред, прашањето за името и Договорот од Преспа беа дел од темите за кои грчкиот премиер Алексис Ципрас и лидерот на опозициската Нова демократија, Киријакос Мицотакис разменија меѓусебни обвинувања.
Жестоката дебата се случуваше за време на вчерашната пленарна седница во грчкиот Парламент пред гласањето на законот што ги поништува одредбите што предвидуваа кратења на пензиите од 1 јануари 2019
Опозиционерот Мицотакис, како што пренесе МИА, ја обвини актуелната влада дека се пазарела и го „размени скопското прашање за пензиите“, а паралелно побара да се распишат избори за грчкиот народ да одлучи за Договорот од Преспа.
-Господине Ципрас, ќе ви го кажам она што меѓу себе го дискутираат веќе сите граѓани: го разменивте скопското прашање со намалувањето на пензиите. Разменивте мерка што не требаше да ја имате изгласано, со една голема национална отстапка. Ова, господине Ципрас, беше билетот, со кој патувавте од Преспа до Итака. Во Преспа, каде што ги отстапивте македонскиот јазик и македонската националност, а на Итака, каде што го изрежиравте наводниот излез од меморандумите. Но, ова не им служи на интересите на земјата. Им служи на странските интереси, рече Мицотакис.
-И доколку со овој закон, овде носиме размена и не ги намалуваме пензиите бидејќи ја распродаваме Македонија, вие зошто ќе гласате за овој закон што е замена за распродавањето на Македонија? Зошто го гласате? Зарем не Ви е ни најмалку срам да ги кажувате овие работи во грчкиот парламент? Колку ниско ќе паднете? Ве повикувам да не гласате за да не се скратат пензиите, доколку мислите дека тоа е производ на размена за едно толку критично национално прашање, му одговори Ципрас.
Лидерот на Нова демократија побара да се распишат предвремени избори „за да му се даде можност на народот да ја земе судбината во свои раце и самиот народ да одлучи за срамниот Договор од Преспа“.
Исто така, Мицотакис побара одговор од грчкиот премиер да ги коментира последните изјави на македонскиот премиер и го повтори неговиот став од изминатите денови дека „Заев слави и го промовира договорот“ бидејќи го добил она што ниту еден грчки премиер во изминатите 26 години не го отстапил- македонски јазик и македонска националност.
Грчкиот премиер му одговори на Мицотакис дека Договорот од Преспа не признава никаква нација или националност, додека пак за јазикот повтори дека тој е официјално признат од 1977, а воедно упати порака и до Македонија, дека доколку не се почитува она што е предвидено со Договорот од Преспа, нема да има ни ратификација во грчкиот парламент, ни членство во ЕУ и НАТО.
-Неколку пати имам нагласено, а е разјаснето и од сите меѓународни фактори дека поранешната југословенска Република Македонија мора, како со уставните амандмани што се дискутираат овие денови, бидејќи се разговара за претстојната промена на Уставот како што е дефинирано од Договорот од Преспа, но така и со изјавите на нејзините функционери, мора да ги почитува духот и текстот на Договорот од Преспа. Ако тоа не се случи, им кажавме и нив, но и јавно дека нема да оди напред ниту договорот ниту интеграцијата на соседната земја во меѓународните организации, рече Ципрас и додаде дека внимателно, без избрзување чекаат да заврши процесот на уставни измени.