На европскиот север по клупска историја. Фудбалерите на Шкендија вечерва се гости на Розенборг во првиот меч од плејоф рундата за групна фаза во УЕФА Европа лигата. Мечот на „Леркендал“ стадионот во Трондхајм е од 20.45 часот.
Улогата на фаворити им припаѓа на Норвежаните. Свесни за тоа се тетовци кои најавуваат борба до последен атом од силите и верба дека можат до резултат за активен реванш на „Филип Втори“ арена. Но, македонскиот шампион е свесен и за третата шанса во низа што ја има пред себе за уште шест силни меѓународни настапи до крајот на годината. Гент се испречи пред „црвено-црните“ во 2016 година, Милан во 2017 година, сега Розенборг кој можеби не претставник на првиот европски ешалон клубови, но, секако, е за респект за трофејната историја и големото искуство на европската сцена.
„Цврсто сме решени за конечно да ја минеме и оваа фаза во Лига Европа и да се пласираме во групите. Нема да биде лесно. Го гледавме и анализиравме Розенборг кој е најдобриот клуб во Норвешка. Можам слободно да кажам дека ова ќе биде двомеч на две израмнети екипи. Кој ќе продолжи натаму во Лига Европа ќе се решава на реваншот во Скопје. Ќе биде одлично ако постигнеме гол вечерва. Дојдени сме по тоа, дојдени сме по добар резултат“, истакна Ќатип Османи, тренер на Шкендија.
На претходните три гостувања во квалификациите за Лигата на шампиони ова лето, тетовци забележаа два пораза и реми. Загубија од ТНС во Велс со 0:4 и од Салцбург со 0:3, а мрежите мируваа во Тираспол во реваншот со Шериф, исход што е посакуван и денеска и по можност со голови.
Плејоф за Лига Европа
Торпедо Кутаиси (Грузија) – Лудогорец (Бугарија)
Зенит Санкт Петербург (Русија) – Молде (Норвешка)
Тренчин (Словачка) – АЕК Ларнака (Кипар)
АПОЕЛ (Кипар) – Астана (Казахстан)
Шериф Тираспол (Молдавија) – Карабаг (Азербејџан)
Сигма Оломуц (Чешка) – Севилја (Шпанија)
Судува (Литванија) – Селтик (Шкотска)
Сарпсборг (Норвешка) – Макаби Тел Авив (Израел)
Малме (Шведска) – Митјиланд (Данска)
Аталанта (Италија) – Копенхаген (Данска)
Базел (Швајцарија) – Аполон (Кипар)
Диделанж (Луксембург) – Клуж (Романија)
Олимпијакос (Грција) – Барнли (Англија)
Генк (Белгија) – Брондби (Данска)
Олимпија Љубљана (Словенија) – Спартак Трнава (Словачка)
Партизан (Србија) – Бешикташ (Турција)
Рапид Виена (Австрија) – ФЦСБ (Романија)
Зорја (Украина) – Лајпциг (Германија)
Гент (Белгија) – Бордо (Франција)
Глазгов Ренџерс (Шкотска) – УФА (Русија)
Розенборг (Норвешка) – Шкендија (Македонија)