Ќе бидат потребни четири месеци за германскиот енергетски регулатор да го официјализира „Северен тек 2“, пишува Ројтерс. Пред неколку дена, Газпром објави дека гасоводот е целосно завршен и дека првите испораки може да се извршат веќе на 1 октомври. На 8 септември, германската агенција ја доби целосната документација за проектот, а откако регулаторот ќе ја заврши инспекцијата на проектот, нацрт-одлука за издавање лиценца за работа на гасоводот ќе биде испратена до Европската комисија.
Германската агенција мора прво да се увери дека „Северен тек 2“ е во согласност со европските правила. Едно од нив е дека сопственикот на мрежата и добавувачот на суровина мора да бидат различни правни лица.
„Северен тек 2“ го удвојува капацитетот на гасоводите што во моментов ја снабдуваат Германија со гас од Русија. Сепак, проектот наиде на многу критики од страна на САД и Украина, како и други европски земји, поради зголемената зависност на Европа од рускиот природен гас.
Последниве недели германската канцеларка Ангела Меркел се обидува да ги намали тензиите околу гасоводот. За време на посетата на Киев, таа го увери украинскиот претседател Володимир Зеленски дека има начини да се спречат обидите на Москва да го искористи проектот како геополитичко оружје.
Изминатиов викенд, Меркел ја оствари својата последна посета на Полска, каде рече дека и дала јасен сигнал на Русија дека Украина ќе остане транзитна земја за рускиот природен гас и по истекот на договорот меѓу двете земји во 2024 година.