Франк де Бур доби работа преку барата. Холанѓанецот е назначен за нов, втор, тренер на Атланта јунајтед во американската МЛС, тим што е формиран пред само четири години, но е актуелен сопственик и на титулата во лига купот.

Поранешниот репрезентативец на „лалињата“ и член, меѓудругото, на Барселона ја доби довербата на клупската управа пред Карлес Пужол кој, исто така, беше кандидат за наследник на Аргентинецот Херардо Мартино на клупата на тимот од „Мерцедес Бенц арена“.

Де Бур го имаше првото тренерско искуство во 2007 година во младите категории на Ајакс. Потоа беше асистент во стручниот штаб на репрезентацијата на Холандија на Светското првенство во Јужна Африка во 2010 година.

Првиот тим на „копјаниците“ од „Амстердам арена“ му беше доверен од 2010 година до 2016 година и во тој период ги предводеше до четири шампионски титули во холандската Ередивизија. Потоа беше именуван за тренер на Интер и на Кристал Палас, средини вои кои се задржа по неколку месеци.