Рафаел Надал има еден куп причини за задоволство. Се врати на победнички патеки по тешкиот период што го има зад себе и покажа дека е во добар ритам за тениската сезона на земја во која го очекуваат неколку значајни турнири меѓу кои и Ролан Гарос, вториот гренслем во сезоната. Шпанецот по 11. пат во кариерата го освои Мастерсот во Монте Карло по триумфот над Кеи Нишикори, исто така рековалесцент на АТП турот, со 6:3, 6:2 за потврда дека му „лежат“ настапите во Кнежевството.
„Благодарност до мојот тим, до семејство и до сите кои ме поддржуват. Минав низ тежок период во изминатите пет месеци поради повреди што ме следеа. Овој ден е специјален за мене. Чувството е посебно при секое освојување на Монте Карло. Благодарност и до публиката. Се гледаме догодина“, истакна Надал.
Трофејот во Монте Карло е вкупно 31. од Мастерс серијата за Шпанецот. Со тоа го претекна досегашниот рекордер Новак Ѓоковиќ кој има 30 победи на турнирите од категоријата 1,000.
„Честитки и до Кеи за одличните изданија на турнирот. Секогаш е тешко да се вратите на терен по период на повреди. Среќен сум што повторно игра добар тенис“, додаде моментно водечкиот на АТП листата.
Надал наскоро ќе има нова шанса за продолжување на жетвата на Мастерс трофеи од серијата 1,000. Пред шпанскиот тенисер е турнирот во Мадрид од шести до 13 мај каде ќе настапи како бранител на титулата.