Хрватска го претрпе првиот пораз на Светското ракометно првенство. И тоа во меч во кој најмалку се очекуваше. Бразил ги совлада „коцкестите“ со 29:26 во првиот настап за двете селекции во групата Е од главната фаза.
Лидер на „кариоките“ беше Лангаро со девет гола, Боргес постигна пет, а Поцер, Тешеира и Толедо реализираа по трипати. Листата со стрелци во хрватската репрезентација ја предводеше Дувњак со шест гола, еден повеќе од триото Хорват-Степанчиќ-Штрлек.
Лино Червар, се чини, го загуби мечот со доследноста да напаѓа со „седум на шест“. Неговите ракометари направи многу грешки, а таквата определба овозможи простор за Бразилците да казнат со брзи и лесни голови. Јужноамериканскиот тим водеше во текот на сите 60 минути и заслужено ги запиша првите бодови со кои отвори перспективи за вмешување во борбата за место што обезбедува квалификации за олимписките игри во Токио во 2020 година.