Од наредниот месец треба да почне процесот за донесување на нов закон за пензионирање согласно кој во пензија ќе мора задолжително да одат сите лица со навршени 64 години. Исклучок од ова се здравствените работници – лекари и медицински персонал, како и кадри од областа на високото образование.
Како што најави денеска премиерот Зоран Заев, законот треба да почне да се применува од јануари наредната година. Според податоците кои ги добил од МИОА, во моментот има околу 10.300 лица на возраст над 64 години, а сè уште се во работен однос.
„Вака ќе отвориме простор за младите и перспективни кадри кои ќе може да движат напред. Законот е замислен да биде задолжително пензионирањето на 64 години, односно 62 години за жените, освен за вработените во здравство, лекари и медицински персонал и за високото образование. Секако ова ќе мине во конуслтатиции со синдикатите и со коморите, да видиме што правиме со одредени дефицитарни струки за да не се создаде недостиг на кадри“, рече Заев по средбата со стопанските комори.
Тој истакна дека пензискиот систем е стабилен и оти може да ги апсорбира евентуалните идни пензионери.
„Ова е процес што ќе биде отворен од септември, да има конечна примена од 1 јануари, а конечната цел е да се даде шанса на младите кадри и тоа не само за јавната администрација, туку и во приватниот ектор. Ова, исто така, ќе овозможи и да се намали јавната администрација, секако и конечно да се подобри квалитетот на работење“, рече премиерот Заев.
Тој истакна дека дефицитарни кадри и натаму ќе може да се ангажираат, исто како што ќе може да се ангажираат и искусни советници доколку е тоа потребно.