Published: Tuesday, November 19, 2024 10:45
Утрово вработените на ЈП Улици и патишта испратија соопштение во кое најавуваат штрајк пред Собранието на Град Скопје. Тие велат дека за почетокот на штрајкот ќе известат дополнително.
Најавениот штрајк е поради лошото менаџирање на двоецот Арсовска – Глигоров преку разрешениот директор Ванчо Умленски, претпријатието повторно како и минатиот месец има сериозни проблеми со исплата на личниот доход на вработените, информираат вработените во јавното претпријатие.
А како причини за ваквата состојба тие ги наведуваат следниве:
1. Презадолжување на претпријатието кон добавувачи на материјали во износ од 240 милиони денари;
2. Не плаќање на долгот од страна на директорот, односно градоначалничката, т.е. селективно плаќање на фирми блиски до секретарот и градоначалничката;
3. Сметката е блокирана во износ од 10 милиони денари и извршни решенија во износ од 40 милиони денари кои ќе стапат на сила наредниов период;
4. Во претпријатието нема основни средства за работа како нафта, ризла, тампон, рабници. Причина за ова е не плаќањето на обврските кон добавувачите, а со тоа и испораката на материјалите;
5. Градежни машини и возила што поради погоре наведените причини се со дефекти и не се сервисираат со месеци;
Вработените од ЈП Улици и патишта најавуваат дека на штрајкот пред Собранието на Град Скопје ќе дојдат со целата механизација.