Тринаесет Палестинци се убиени во израелски напади врз училиште во северниот дел на Појасот Газа, во кое биле сместени раселени семејства, објавија локалните здравствени власти. Ова се случува во време на континуирано уништување на домови и згради од страна на израелските сили во јужниот град Рафа.
Медицинските лица објавија дека два од нападите биле насочени кон училиштето Карама во Туфа, предградие на градот Газа. Локалната новинарка Нур Абду е меѓу загинатите, објавија палестинските медиуми. Израелската армија не го коментираше инцидентот.
Вчера, во два напади врз училиштето во бегалскиот камп Буреџ, во кој исто така биле сместени раселени семејства, загинаа најмалку 29 лица, вклучувајќи жени и деца. Израелската армија соопшти дека цел на нападот бил команден и контролен центар на палестинската вооружена група Хамас, кој се наоѓал во комплексот.
Бригадите Из ад-Дин ал-Касам, военото крило на Хамас, денеска соопштија дека нивните борци детонирале однапред поставено минско поле, со цел да ги погодат израелските оклопни трупи позиционирани источно од Кан Јунис. Тие изјавија дека претрпеле жртви, по што областа била гранатирана со минофрлачи.
Во блиската област Рафа, во близина на границата со Египет, жителите и извори од Хамас изјавија дека израелските сили, кои ја презедоа контролата врз градот, продолжиле да разнесуваат и уништуваат куќи и згради.